நவீன சரஸ்வதி சபதம் 

கோவை ஆவி

இன்ட்ரோ

கதை  

குடிப்பழக்கம் இன்றைய காலகட்டத்தில் அநேகமாக எல்லா இளைஞர்களிடமும் பரவிக் கிடக்கிறது. குடிப்பது நாகரீகமாகவே கருதப்படும் நிலையும் உருவாகி வருகிறது. இன்றைய இளைஞர்களை வழிநடத்த குடிப்பழக்கம் தவறானது என்று உணர்த்த கடவுள் நடத்தும் சித்து விளையாட்டு தான் படத்தின் கதை. இதனிடையே ஜெய்-நிவேதா தாமஸ் இடையே மெல்லியதாய் ஒரு காதல் கதையும்..

படத்தின் எதார்த்த ஹீரோ VTV கணேஷ் தான். மனிதர் தனக்கு கிடைத்த வாய்ப்பினை வெளுத்து வாங்கியிருக்கிறார். குறிப்பாக இரண்டாம் பாதியில் படத்தை நகர்த்திச் செல்வது இவர்தான். ஓரிரு படங்களுக்கு பிறகு இவர் ஹீரோவாக நடித்தாலும் ஆச்சர்யப்படுவதற்கு இல்லை. ராஜா ராணியின் வெற்றிக்கு பின் ஜெய் நடித்து வந்திருக்கும் படமென்பதால் நல்ல எதிர்பார்ப்பு இருந்தது. அதை முழுமையாக நிறைவேற்றியிருக்கிறார். சத்யன் இடையிடையே சிரிப்பை வரவழைத்தாலும் இன்னும் கொஞ்சம் உழைத்தால் மட்டுமே நிலைத்திருக்க முடியும். 

சுப்பு பஞ்சு சிவபெருமான் வேடத்திற்கு அருமையாக பொருந்தியிருக்கிறார். இவரும் மனோபாலாவும் வரும் காட்சிகள் கலகல.. பார்வதி வேடம் தேவதர்ஷினிக்கு, அம்மணி காமெடியில் கலக்குகிறார். கேரள இறக்குமதி நிவேதா தாமஸ் பெரிய வேடம் இல்லையென்றாலும் தமிழில் ஒரு ரவுண்ட் வருவதற்கான சாத்தியக் கூறுகள் நிறைய உள்ளது. மனோபாலா, படவா கோபி, சித்ரா இலட்சுமணன், ராஜ்குமார் என ஒவ்வொருவரின் தேர்வும் அருமை. 

கோவை காமராஜ் சித்த வைத்தியசாலை", வாரிசு அரசியல், விலை கொடுத்து வாங்கும் தண்ணீர் என தற்போதைய தமிழ்நாட்டு நிலவரங்களை கிண்டல் செய்வதில் துவங்கி, நகைச்சுவையாய் நகர்ந்தாலும் நான்கே கதாபாத்திரங்கள் கொண்டு கதை நகர்த்த முற்படும் போது இன்னும் கொஞ்சம் வலுவான திரைக்கதை இருந்திருக்கலாம். வசனங்களில் சிக்ஸர்கள் அடித்த போதும் காட்சியமைப்புகள் சில இடங்களில் தள்ளாடுவதை தவிர்த்திருக்கலாம்.